Rom 3 | PWG | STEP | Jiu damsi na avi iyoyoi da kupuna damsi ighekuyowesi? Kwimata bekasi ituviviratawei na avi biibiina ina panani?

a 3:4Psa 51:4

b 3:10-12Psa 14:1-3, 53:1-3

c 3:14Psa 10:7

d 3:15-17Isa 59:7-8

e 3:18Psa 36:1

f 3:20Psa 143:2; Gar 2:16

g 3:22Gar 2:16

h 3:30Deut 6:4; Gar 3:20

Romans 3

1 Jiu damsi na avi iyoyoi da kupuna damsi ighekuyowesi? Kwimata bekasi ituviviratawei na avi biibiina ina panani? 2 Biibiina ghamana epanapanani. Sago na God vonana giruma katamana kamonai na ti damsi kurisi ivi debei. 3 Ti na vonakiiyapa bagibagina iterei God kurina da tuna kava iti tumaghanei, ma mikeda viya ivi kiigiiyei na ikikava? I vonakiiyapa bagibagina ivi kiigiiyei na ke kuna notai da God bade ina vonakiiyapa bagibagina ini kiigiiyei. 4 Kegha, kegha taweyana. Wawaya peyarina na viviberosi ma God tuna na vonavaghata. Giruma katamana kamonai Kiivavo David, God kurina ivona bo,

“Kuna vivisisiya na am sisiya maninina kavakava.
Vitupavira kamonai wawaya kuni wavui na i sisiya kudubina kuna ravi.” ^a
5 Ita berabero ma God ina yawasa maninina ivi ruwa takitai na ita berabero God ina yawasa maninina ku yagharina etereterei da takita bubuni. Tuna kubiine ikikava tavona? God ita berabero kubiine kovogha everevereta na kenotanotai da eberabera beroi kurita bo? Weni nakanani wawaya viya isisiya. 6 Kegha taweyana. Mikeda God na ke wawaya maninina na ke kovokovoghina da wawaya kudubisi dobuwai iti tupaviresi.

7 Kuta vona bo, “Avi bero na God avi vitei, iyamna aku berabero kubiine kana kadara ma ina vonavaghata erurudeba da yaghara kiikiina. Tuna kubiine taku na ikikava? Avi kubiine aku berabero kubiine God ini wavuku ma kovogha ina vereku?” 8 Kata vonavinama bo, “Berabero kata bera kirakiiyei da God ina biibiina kata tinariyai.” Wawaya viya iavaberoweku ma iwavuku da taku nakanani aibeyebeyena. Ti na kovogha ghamana ina viiya.

Ke sago wawaya maninikiikiina.

9 Ikikava tavona? Tota Jiu damta tabiibii kirakai ke kupuna damsi nakanani, bo? Kegha! Namada avi debei da kupuna damsi ma tota Jiu damta peyarita na sago. Peyarita na berabero ina rewapana kamonai tamakamakai. 10 Giruma katamana evonavoneta bo,

“Ke sago iyai wawaya maninina, kegha taweyana.
11 Ke sago wawaya akakovina,
Ke sago wawaya God itekwekwai.
12 Wawaya kudubina God ibarei ma imiirikupukuputei.
Ti na peyarisi God ku matana na kwebusi.
Ke sago iyai bera maninina ita beraberai, kegha taweyana.
13 Kawasiyai sisiya dowadowasi ekiikiibau nakanani ma karawaga kamonai dogo ita arai da bowana ita kiikiibau.
Pepasi ikuvirevirei da sisiya vibero eberaberai.
I sisiya beroberosi na nakanani ma mota berona kawagegurina ita kiikiibau. ^b
14 Mara nonowa kawasiyai sisiya dowadowasi eberaberai na damina ibero kirakai. ^c
15 Ma iyaghiyaghina kirakai da wawaya ini gubagi bo ini raboboi. ^d
16 Mike enenae na wawaya ekiikiiviberosi ma nuwapoya evereveresi.
17 Nuwanuba gwabisiyai kegha.
18 Ma God ke ita yabuyabumanei.” ^e
19 Takovi da vonaviyoyovana na Jiu damsi kubiisi ma tuna kamonai kii sisiya eberaberai da ti na berabero wawayisi. Ma bade God vonaviyoyovana ivokiibuwei na dam kudubina kawasi kiipotana kubiine da ke ini tupariyei, iyamna peyarisi na God ini tupaviresi. 20 Wawaya ke kovokovoghina da vonaviyoyovana ina nunura bubuni da God ku matana ti na wawaya maninisi. Vonaviyoyovana emakamakai na idebeta da tota na berabero wawayita. ^f

Ikikava God ina terevimaninita.

21 Ma karako na God keta vuna ivi debei da ikikava ina vonakiiyaragha da tota wawaya maninita ku matana. Nani ketana na ke vonaviyoyovana tepanai ma kegha da vonaviyoyovana ma peroperoveta ivi mamatarei da mara sago ina nekiibau. 22 Namanaki tam Jiu bo kupuna wawayim, kudubita ita keta sago kava da yawasa maninina tapanani. Iyavo kava Yesu ini tumaghanei na God ku matana ti na ina wawaya maninisi. ^g 23 God na wawaya maninina ma kana kadara irakata kirakai da tota ke kovokovoghina da ita yawasa kati maninini da tuna nakanani, iyamna kudubita na berabero wawayita. 24 Ma God ina agabiibai irakata kirakai da nevana kava ipuyota, yawasa ivereta ma ivonakiiyaragha da tota wawaya maninita. Peyarita ita berabero kamonai ma Yesu Keriso ivotaweta da yawasa tapanani. 25 God Natuna ivonatawei isuwara da ita berabero vitana ikavari. Wawaya Yesu ini tumaghanei na i berabero kudubina taranai ina kowatawei da God ina nuwapughu ina vovinubai. Weni berana iberai da iti beyeta da tuna wawaya maninina. Namadani kava wawaya i berabero kudubina ikitakitatawei, ivivi koyakoyagha 26 da karako weni maranai ivi debei da vonavaghata tepanai wawaya i berabero ini tupavirei, ke ina kitatawei. Ma iyavo kava Yesu itumaghanei na God ina vonakiiyaragha da ti na ina wawaya maninisi.

27 Ke kovokovoghina da takayotata da tota mani ita rewapanai tavona da tota God ina wawaya maninita. Kegha taweyana. Ma avi kubiine? Ke ita bera biibiisi kubiine bo vonaviyoyovana kata nunura bubuni da God ina vonakiiyaragha da tota biibiita. Kegha, ita vitumaghana kubiine na nakanani ina voneta. 29 Ma God na Jiu damsi kava i God bo? Kegha. Tuna na dam kudubita ita God. 30 Namanaki da tami Jiu dami bo kupuna dami ma kegha da God na sago kava. Tuna kubiine iyavo kava Yesu itumaghanei na God ina vonesi da ti na ina wawaya maninisi. ^h 31 Weni vitumaghanina vuna tavi karei iberai da vonaviyoyovana na iyamna kegha, bo? Kegha taweyana, titumaghana na tidebei da vonaviyoyovana iyamna vaghata tavovotani.